Kadungan sang pagselebrar sang Fire Prevention Month sini nga Marso, nagpanugyan ang bag-o nga Fire Marshal sang Bacolod City Fire Station nga mangin vigilante samtang nagahilapit ang tag-ilinit bangud ang insidente sag sunog ang indi malayo.
Sa interview sang Bombo Radyo kay Fire Chief Inspector Rodel Legaspi, ginpahayag sini nga may mga events sila nga ginpatigayon agud maghatag sang awareness sang publiko nga nagapaandam kag nagapabalo sa mga pumuluyo sang risgo sang sunog sini nga summer.
Suno kay Legaspi, luyag sini nga ang pagpaandam sa publiko ang magapadayon sa bilog nga tuig gani may mga aktibidad sila nga ginapatigayon kaangay sang Oplan Ligtas Pamayanan.
May yara man sang innovative program sa ciudad kaupod ang Department of Education kun sa diin kada semana, may timeslot ang BFP agud diskusyunan ang mga fire preventive measures sa mga kabataan kag ginikanan nga nagapamati.
Suno diri, sang tinalikdan nga Biyernes, may ginpatigayon nga exhibit sa isa ka mall bangud may nag-abot nga bag-o nga rescue truck nagikan sa Manila.
Gindugang man sini nga indi lang pagpakigbato sa sunog ang nahibaluan sang mga bombero kundi ginpakita man nila ang ila mga talento paagi sa isa ka jamming kag performance sa isa ka mall sa ciudad.
Nagpangabay man si Legaspi sa mga pumuluyo sang ciudad nga ang fire prevention ang indi lang trabaho sang BFP kag gina-engganyo ang mga panimalay sang insakto nga house keeping.
In kaso nga masunugan suno sa iya, indi na magbalik sa balay kun may nalipatan bangud mas importante ang kabuhi sang sa maskin ano nga gamit
Si Legaspi ang nagserbi naman bilang fire marshall sang Bacolod City sang 2003 tubtob 2004 antes ini gin-assign sa nagkalain-lain nga lugar.
Antes siya magbalik sa ciudad sini nga tuig, siya ang nagserbi bilang pinuno sang Himamaylan City Fire Station.
