Padayun ang pagpahanumdom sang Bureau of Fire Protection (BFP) – Bacolod sa mga pumuluyo nga mangin resonable sa paggamit sang palupok subong nga yuletide season.
Sa interview sang Bombo Radyo Bacolod kay Fire Chief Inspector Rodel Legaspi, ang fire marshall sa Bacolod City Fire Station, may permit nga kinahanglan I-secure gikan sa mga local government units (LGUs) antes makabaligya sang palupok.
Samtang may designated area man nga ginatalana ang LGUs kun sa diin sarang makabaligya sang firecrackers kag pyrotechnics kasubong man designated areas para sa pagpalupok.
Pahanumdom ni Legaspi nga ginadumilian gid ang patago nga pagbaligya sang palupok sa gwa sang designated area.
Nagapangabay ini nga magasunod ang tanan agud nga mangin matawhay ang pagsaulog sang paskwa kag bag-ong tuig.
Suno diri, sa designated area maseguro nga regulated ang mga ginabaligya agud malikawan man ang mga wala ginapangayo nga kahalitan.
Aminado man si Legaspi nga kultura na sang mga Pilipino ang magpalupok gani, pahanumdom sini sa mga nagabaligya nga butangan gid sang signages sa mga kiosk nga nagapahanumdom sang “no testing” kag “no smoking”, agud malikawan ang insidente.
Dapat man nga may nakapreparar nga tubig, balas kag fire extinguisher sa kiosk agud magamit inkaso nga may sunog samtang ang kada kiosk ang dapat may maligwa nga lugar kag organisado nga exit points agud malikawan ang pagginutok kun may matabo nga sunog.
Ginapasalig man ni Legaspi nga may igadeploy nga firetruck kag mga BFP personnel sa firecracker selling areas humalin sa pagsugod sang pagbaligyaanay tubtob sa matapos.
Ang mga BFP personnel ang una naman nga nakatsekyar sa mga koisk antes napahanugutan ang pagbaligya.
Pahanumdom naman ni Legaspi sa mga magapalupok nga maghalong nga wala sang magtupa sa mga atop nga human sa combustible material kaangay sang nipa, samtang magplastar man sang drum sang tubig nga magamit inkaso may magluntad nga sunog.
