Tatlo ka mga balay ang natupok sang kalayo sa nagluntad nga sunog sa Purok Rosas, Sitio Sibucao, Barangay Banago, Bacolod City kahapon sang kaagahon.
Sa interview sang Bombo Radyo Bacolod kay Fire Chief Inspector Stephen Jardeleza, fire marshal sa Bacolod City Fire Station, nabatun nila ang tawag natuhoy sa sunog alas-4:40 kahapon sang kaagahon kag gilayon man nila nga ginrespondihan.
Apang bangod congested kag critical area ang lugar kag yara pa sa tunga ang panimalay, nagdangat pa sa 22 ka fire hose ang kinahanglan nila nga isugpon agud malab-ot ang nasunog nga balay.
Dako man ang pagpasalamat ni Jardeleza bangod nagbucket brigade ang mga pumuluyo agud indi maglapta ang kalayo sa iban pa nga mga pamalay.
Sa imbestigasyon, electrical in nature ang rasun sang sunog kag ini ang nagikan sa panimalay ni Daisy Guevarra.
Suno kay Jardeleza, ginalantaw nga bangod sa hangin nagabag-id ang service entrance tubtob nga naupod ang insulation nga nagresulta sa electrical arcing kag pagkasunog sang balay.
Magluwas sa balay nga ginhalinan sang sunog, nalab-ot man ang balay ni Dexter Guevarra tubtob nga naglatay sa panimalay ni Hernando Espinosa.
Ang tatlo ka balay ang totally damaged samtang ang estimated value sang kahalitan ang ginabanta yara sa P41,000.
