Nagpatigayon na sang site validation sa mga katubuhan sa probinsya sang Negros Occidental kag Negros Oriental ang mga katapo sang Bureau of Plants and Industry nga kabahin sang gintukod nga Inter-Agency Task Force batok sa pag-atake sang red-striped soft scale insects ukon RSSSI.
Suno kay Department of Agriculture Negros Island Region Regional Executive Director Engr. Jose Albert Barrogo nga nagpadulong sa probinsya sang Negros Occidental ang task force agud tsekyaron ang sitwasyon sang mga kampo sang tubo.
Kahapon, nag-abot na ang mga katapo sang Bureau of Plant Industry Central Office nga may dala nga mga pesticides batok sa RSSI kag ginalantaw pa kun san-o maumpisahan ang pagpang-spray sang pesticide.
Suno kay Engr. Barrogo, ginahulat sang DA ang rekomendasyon sang Sugar Regulatory Administration kun sa diin nga lugar una patigayunon ang spraying operation.
Samtang, sa ginhiwat nga meeting sang Inter-Agency Task Force, ginrekomendar sang SRA ang pagpatigayon sang quarantine ukon pag-restrict sang pagpagwa kag pagpasulod sang mga patdan agud maibetar ang paglapta sang RSSI.
Dugang pa nga ginalimitahan man ang pagpasulod sang mga tawo sa mga kampo ukon pagsaylo-saylo sa kampo bangud ang insekto ang mahimo magtapik sa bayo kag magkamang man sa iban nga tubo.
