Ginahulat pa sang Bureau of Plant Industry – Plant Quarantine Services (BPI-PQS) Negros Occidental ang guidelines nagikan sa head office agud nga mapatuman ang pagregulate sang presyo sang ornamental plants nga ginabaligya ilabi na ang sa online.
Sa interview sang Bombo Radyo Bacolod kay Jenauh Job Jamili, senior agriculturist sang BPI PQS, ginpaathag sini ang benepisyo sang pagregulate sang presyo sang mga ginabaligya nga ornamental plants sa tunga sang ginapangatubang nga pandemya.
Suno diri, dapat nakarehistro ang mga nursery sang mga nagabaligya sang mga bulak agud maregulate bangud pila sa mga ini ang nagapang-into sa kustomer.
Suno kay Jamili, nagakadapat man nga maregulate ang presyo ornamental plants.
Ang pagregulate sang presyo sang mga bulak suno kay Jamili ang makabulig man sa mga nagabakal sa tunga sang pandemya bangud ang ginahatag nga presyo sang iban nga plantito ukon plantita ang tuman kamahal kun ipaanggid sa size ukon variety sang tanom.
Nagapati man ini nga ang pagkahuyog sang mga tawo sa tanom subong ang bangod luyag nila nga mabalhin ang atensyon sa iban nga mga bagay bangud masami nalang mabatian ang tuhoy sa COVID-19.
