Makita na ang epekto sa sektor sang negosyo sang pagsaka sa produktong petrolyo bangod sa gyera sa tunga sang Iran kag Israel.
Sa interview sang Bombo Radyo Bacolod kay Frank Carbon, chief executive officer sang Metro Bacolod Chamber of Commerce and Industry, dako ang epekto sang hinali nga pagsaka sa presyo sang diesel nga nagdangat sa P5.
Suno kay Carbon, wala sang makaluwas bangod apektado ang transport sector, factories kasubong man ang agricultural machineries.
Pahayag ni Carbon nga grabi na kuntani ang expansion sang investments sa Bacolod City kaangay sang malls, hotels kag condominium.
Apang sa karun, ini ang temporaryo nga mauntat bangod magapaminsar anay ang mga negosyante nga luyag magpasulod sang investments kun sa diin padulong ang sitwasyon.
Kalakip sa ginapanilagan sang mga ini ang pabag-o bag-o nga desisyon ni US President Donald Trump may kaangtanan sa pag-ilinaway.
Nagapati ini nga indi lamang ceasefire ukon pagguba sa nuclear developments ang tuyo ni Trump kundi ang maislan ang liderato sa Iran, sang masarangan nila nga madominar agud tayuyon na ang pag-untat sang gyera.
Apang sa karun nga sitwasyon, nagapanilag pa ang mga negosyante, ginareview ang hulag sa merkado kag ang epekto sa operasyon sang pagtaas sa presyo sang diesel.
Pahanumdom ni Carbon nga sa pagsaka sang presyo sang diesel, apektado ang transportasyon sang mga produkto, nagadako ang gasto sa operations sang mga factory kasubong man ang ginagamit nga gatong sa mga farm equipments.
Ang pagsaka sa operational kag transport costs ang lauman naman nga ipass-on sang mga negosyante sa konsumedor pinaagi sa pagpasaka sang presyo sang produkto kag serbisyo.
Gani masiling sini nga indi lamang pila ka sektor ang apektado sang pagsaka sang presyo sang gatong, kundi ang tanan nga pumuluyo.
