Aminado ang business sector nga dugang nga palas-anon ang padayon nga pagsaka sang presyo sang produktong petrolyo nga nagdungan man sa wage order nga nagapasaka sang minimum wage sa Western Visayas padulong sa P420 kag P450.
Sa interview sang Bombo Radyo kay Frank Carbon, chief executive officer sang Metro Bacolod Chamber of Commerce and Industry, ginahulat pa ang desisyon sang National Wages and Productivity Commission sa appel nga ila ginfile nga nagahingyo nga indi lang anay pag-ipatuman ang wage hike subong nga tuig.
Sa masunod nga semana, magasapol sanday Carbon kanday Mayor-elect Albee Benitez, Vice Governor Jeffrey Ferrer kag Congressman Greg Gasataya agud hingyuon kun paano sila makabulig sa appeal sa NWPC.
Aminado naman si Carbon nga wala sang kontrol ang Pilipinas sa presyo sang produktong petrolyo bangud ini ang imported.
Makapila na ka beses suno sa iya gin-apelar nga isuspend lang anay ang excise tax apang wala ini napamatian kundi naghatag lang sang ayuda sa mga driver.
Nagadungan man diri ang pagsaka sang balor sang dolyar batok sa piso.
Suno sa negosyante, apektado ang mga negosyo kun nagasaka ang presyo sang produktong petrolyo bangud nagamahal man ang gasto sa transportasyon.
