Indi komporme ang Metro Bacolod Chamber of Commerce and Industry (MBCCI) sa apelasyon sang mga doktor sa Bacolod nga liwat nga ipadalum sa enhanced community quarantine ang ciudad.
Sa interview sang Bombo Radyo kay MBCCI chief executive officer Frank Carbon, ginpahayag sini nga ginpaidalum sa ECQ ang ciudad sang Marso tubtob Mayo bangud indi pa preparadp ang lokal kag national nga gobyerno sa pagresponde sa coronavirus.
Suno kay Carbon, sang nasambit nga mga bulan, wala pa sang quarantine facilities, testing laboratories, testing kits, personal protective equipment sa mga frontliners kag mga health protocols.
Suno sa iya, ginpaidalom sa lockdown ang ciudad agud indi makagiho ang mga pumuluyo kag makapreparar ang gobyerno.
Suno diri, subong nga may yara na sang mga laboratoryo kag nakahibalo na ang local government sang pagahimuon, wala sang rason nga ibalik pa ang ciudad sa ECQ.
Gindugang man sang chief executive officer nga madamo sang mga negosyo sa karun nga naga-operate nga tunga lang ang mga empleyado kag kun ibalik ang ECQ, posible nga magsirado na naman ang mga ini kag mas madamo ang mawad-an sang trabaho.
Ginatugyan naman sini sa national inter-agency task force ang desisyon bangud nagapati si Carbon nga igakonsiderar sang mga ini indi lang ang aspeto sang ikaayong lawas kundi subong man ang sa bahin sang kwarta kag ekonomiya.
