May yara sang komunikasyon ang business sector kag ang Bacolod City Police Office agud makabulig sa pagpabilin sang safety kag order sa ciudad sang Bacolod.
Nahibaluan nga may yara sang bag-o nga modus ang mga hold-upper kaangay na lamang sang natabo kay Bago City Councilor Cleo Gaudite sang Miyerkules sang hapon kun sa diin nagsakay sa iya salakyan ang mga suspetsado halin sa 18th Lacson Street kag gintayaan ini sang ice pick samtang nagamaneho.
Paglabay sa Imperial Court sa dalan Gatuslao, ila ginmanduan ang konsehal nga masulod sa motel kun sa diin ini ginhold-up kag gincarnap ang iya salakyan.
Biyernes sang hapon, narekober sa Circumferential Road, Barangay Villamonte ang Mitsubishi Mirage sang konsehal apang blangko pa ang mga pulis kun sanday sin-o ang mga suspetsado.
Suno kay Frank Carbon, chief executive officer sang Metro Bacolod Chamber of Commerce and Industry, naghatag sila sang gasoline allowance sa mga pulis nga nagasakay sa motorsiklo sa tion nga magroving agud nga ang fuel allowance nagikan sa gobyerno ang magamit sa patrol car.
Aktibo suno kay Carbon ang mga pulis kag nagapwesto ang mga ini sa mga lugar kun sa diin nagaluntad masami ang krimen.
Ginpakig-angutan sang Bombo Radyo si BCPO director Police Col. Manuel Placido apang nagbalibad ini nga maghatag sang komento angot sa broad daylight nga hold-up incident.
