Nag-apelar ang secretary general sang General Alliance of Workers Association (GAWA) sa local government sang Bacolod nga indi na pag-iextend ang modified enhanced community quarantine (MECQ) kag ibalik na sa general community quarantine agud mapahagan-hagan ang mga restrictions apang iimplementar gihapon ang mga health protocols.
Sa interview sang Bombo Radyo kay GAWA Secretary General Wennie Sancho, ginpahayag sini nga ila gina-acknowledge ang COVID-19 kag pagpamahog sang virus apang nagaayo ini nga indi pag-ineglect ang palangabuhian sang mag pumuluyo.
Suno kay Sancho, sa pagsuspendi pa lang sang pampubliko nga transportasyon, madamo na nga mga trabahante ang nabudlayan kag mga drivers nga nawad-an sang palangabuhian.
Ginarespeto man sini ang gobyerno apang kuntani tamdun man kun paano mabuhi ang tawo.
Gani nagaapelar ini nga pahagan-haganun ang mga restrictions apang mangin istrikto lang sa pag-implementar sang health protocols.
Samtang, ginkumpirmar man ni Sancho nga pormal pa nga gindiskusyunan sang Regular Wage Board sa Oktubre 7 ang proposal sini nga maghatag sang Pandemic Emergency Relief Allowance (PERA) sa mga empleyado nga nabuhinan ang number of working days ukon working hours bangud sa coronavirus pandemic.
Suno kay Sancho, ini ang para sa mga kompaniya nga may ikasarang nga magdugang sang P20 tubtob P25 kada adlaw sa sweldo sang ila mga empleyado bilang source sang emergency fund.
Apang kun indi naman makasarang ang isa ka kumpaniya, sarang ini nga makafile sang exemption.
Gin-athag man sang GAWA secretary general nga ang PERA ang indi wage increase kundi temporaryo lang nga benepisyo para sa mga empleyado nga naapektuhan ang ubra bangud sa pandemic.
