Ginkompirmar sang chief executive officer sang Metro Bacolod Chamber of Commerce and Industry (MBCCI) nga nagmeeting sila kaupod ang alkalde kag Bacolod City Emergency Operations Center (EOC).
Ini agud maistoryahan ang mangin solusyon sa ginapangatubang nga problema sa COVID cases, sa baylo nga magpatuman sang lockdown ang syudad santo sa luyag sang isa ka grupo.
Sa interview sang Bombo Radyo Bacolod kay Frank Carbon, ang luyag sang grupo nga maglockdown ang makatuga sang negatibo nga epekto sa ekonomiya kun sa diin, sarang ini mag-collapse bangud deficit na ang kapital sang kalabanan nga mga negosyante sa syudad.
Gani nagplastar sila sang solusyon nga indi all out shot gun approach, nga madamo ang maapektuhan kag magutuman.
Suno kay Carbon, dapat targeted ang himuon nga solusyon sang problema agud nga malimitahan ang paglaton sang coronavirus gani dapat itarget ang mga super spreader nga lugar.
Bilang solusyon, nagkomporme sila sa pagpalawig sang curfew hours kun sa diin ginhimo nga 10PM to 4AM ang curfew halin sa 11PM to 4AM.
Nagpatuman man sang total liquor ban sa pampubliko nga lugar, kag pagdumili sang pagtililipon ukon gatherings kaangay sang mga club induction, birthday parties kag reunions kasubong man ang mga pagpanahor.
Ginpahayag man sini nga tinutuyo sang national government nga mabakunahan na ang mga nagatrabaho agud nga makagwa na kag makatrabaho.
Samtang ang private sector ang ginpahanugutan na nga magbakal sang bakuna apisar nga maiwat ang supply sini sa bilog nga kalibutan, agud nga mabakunahan naman ang ila nga mga empleyado.
Suno kay Carbon, kun nagagiho ang tawo agud magtrabaho, ini man ang umpisa sang cycle sang kwarta agud makaamat-amat balik ang ekonomiya.
