Ginapamatukan sang business sector sa ciudad sang Bacolod ang ginaduso nga pagpasaka sang sweldo.
Sa interview sang Bombo Radyo Bacolod kay Frank Carbon, Chief Executive Officer (CEO) sang Metro Bacolod Chamber of Commerce and Industry (MBCCI), bangod sa paglala sang inflation, luyag sang Kongreso nga magpatuman sang P150 nga saka sa sweldo para sa tanan nga mga empleyado.
Dugang pa sini nga ang local wage board sa Western Visayas ang nagapanawagan man sang pagsaka sa sweldo.
Una na suno kay Carbon nga nakapatuman sang Salary increase ang Cebu, Manila kag iban pa nga bahin sang pungsod, apang ginalantaw sini nga kun madayon ang ginaduso sang Kongreso kag maaprubahan ang request sang local wage board, magadangat sa P250 ang pagsaka sa sweldo.
Paathag sini nga magluwas sa aktwal nga pagsaka, maapektuhan man ang iban nga mga hidden costs kaangay sang SSS kag iban pa nga benefits nga nakabase sa balor sang sweldo sang empleyado.
Panindugan ni Carbon nga ang mga employers ang tuman naman ka apektado sa inflation nga nagakatabo worldwide kag indi lamang sa Pilipinas, gani sila ang naga-agunto man bangod sa pagsaka sa presyo sang produktong petrolyo kag iban pa nga mga economic factors.
Bangod sini, ginalantaw ni Carbon nga makabig nga “blue Christmas” ukon masubo ang paskwa para sa mga negosyante subong nga tuig.
