Suspendido ang byahe sang mga barko matapos ginpaidalom sa Storm Signal No. 1 ang dako nga bahin sang Northern Negros Occidental bangod sa Bagyo UWAN.
Sa interview sang Bombo Radyo Bacolod kay Lt Junior Grade John Hofer Olis, spokesperson sang Coast Guard Station Northern Negros Occidental, sila ang nagabase lamang sa ginapagwa nga weather forecast sang state weather bureau.
Santo sa Coast Guard memorandum, kanselado ang sea trips kun yara sa Storm Signal ang port of origin kag port of destination.
Santo sa weather advisory alas-2:00 subong nga hapon, napaidalom sa Signal No 1 ang Bacolod City, kag northern portions sang Negros Occidental nga ginalakipan sang Escalante City, Toboso, Sagay City, Cadiz City, Calatrava, Manapla, Victorias City, EB Magalona, Silay City, Talisay City, San Carlos City, Salvador Benedicto kag Murcia.
Kasubong man ang Northern kag Central portions sang Iloilo kag pila pa ka bahin sang Panay Island, kasubong man ang Northern kag Central portions sang Cebu.
Ginapanawagan man sa mga mangigisda nga likawan anay ang magpalawod.
Panugyan ni Olis sa mga ini nga isafety ang mga pumpboat sa mas mataas nga bahin sang baybayon, agud indi madamage inkaso mangin mabaskog ang pagbalod bangod sa Bagyo.
Nahibaluan nga alas-10:00 kagab-i pa lamang ginpaidalom na sa Signal No 1 ang pila ka bahin sang probinsya, kun sa diin may-ara sang masobra 150 ka pasahero nga nastranded sa BREDCO port.
Sa pagtsekyar sang Bombo News Team kaina sang aga, wala na sang nabilin nga pasahero, bangod ang mga ini ang nagdesisyon na lamang nga magpauli.
