Wala pa ginapasugtan ang pagresume sang commercial sea travel sa Negros Occidental kag Bacolod City sa idalom sang Modified General Community Quarantine (MGCQ) nga nag-umpisa na sa subong nga adlaw.
Sa interview sang Bombo Radyo Bacolod kay Commander Jansen Benjamin, pinuno sang Coast Guard Station Negros Occidental, ginpahayag sini nga padayon sa pagbiyahe ang RORO kag cargo vessel bangud nagadala sila sang essential goods.
Suno kay Benjamin, ang resumption sang commercial sea travel ang kanselado sa gihapon bilang compliance sa MGCQ executive orders nga ginpapanaog nanday Negros Occidental Governor Eugenio Jose Lacson kag Bacolod Mayor Evelio Leonardia epektibo subong nga adlaw tubtob Hunyo 15.
Suno kay Benjamin, mga returning overseas Filipino workers (OFWs) kag locally stranded individuals (LSIs) kag pila ka mga exempted ang ginatugutan sa pagsulod sa probinsya kag ciudad, kalakip na ang interisland travel sa tunga sang Negros kag Panay.
Ginpahayag man sini nga ang mga LSIs ang dapat magpresentar sang travel authority nga nagikan sa point of origin kag medical certificate.
