Padayon nga kanselado ang byahe sang barko sa siyudad sang Cadiz padulong sa Bantayan humalin kahapon tubtob sa karun nga adlaw.
Sa interview sang Bombo Radyo kay Chief Petty Officer Joel Taganile, Commander Coast Guard Sub Station sa siyudad sang Cadiz, ila ginkansela ang byahe kahapon bangod sa makusog nga pagbubo sang ulan, apang apisar nga nagtilhaw na ini sa karun, padayon sa gihapon nga kanselado ang byahe.
Kag suno diri wala sang stranded nga mga pasahero.
Apang sa sentro sang siyudad may yara na sang mga evacuees nga nagapdulong sa evacuation center.
Iya man ginpanawagan ang mga magagmay nga mamamangka nga indi anay magpadagat kag hulaton nga mag-ayo ang tiyempo.
May pila naman ka mga pasahero nga nastranded sa puerto sang San Carlos matapos nga ginsuspend ang byahe apang indi gid man tuman kadamo.
Suno kay Lt. Junior Grade Carla Mayang, commander sang Coast Guard Station Southern Negros Occidental, nagkanay na ang panahon sa nasakupan sang Coast Guard Station Southern Negros tubtub kaina sang udto.
Suno kay Mayang, wala sang passenger vessel nga nagabyahe sa southern Negros apang nagbantay ang ila nga mga personnel sa coastal areas para sa monitoring sa magagmay nga sakayan-pandagat.
Wala naman sang evacuation nga ginmandu sa mga kabanwahanan kag kaciudaran sa sur nga bahin sang probinsya.
Ang Coast Guard Station Southern Negros ang nagasakop sang mga banwa halin sa Pontevedra tubtub Hinobaan.
