Apisar sa nangin maulanon nga panahon humalin kagab-i tubtob sang aga, wala sang ginpatigayon nga kanselasyon sang byahe sang mga barko sa BREDCO Port.
Sa pagtsekyar sang Bombo News Team, ginkumpirmar sang desk officer sa Coast Guard Substation BREDCO nga wala sang shipping company nga nag-anunsyar sang pagkanselar sang byahe.
Suno diri, ang una nga byahe sang Roll-on, Roll-off (RoRo) vessel subong nga adlaw ang ginpatigayon alas-12:00 sang kaagahon padulong sa Dumangas port sa Iloilo.
Apang aminado ang Coast Guard personnel nga dyutay ang mga pasahero.
Suno diri, wala sang may nagkanselar ilabi na nga malayo man sa ciudad sang Bacolod kag probinsya sang Negros Occidental ang Bagyo KIYAPO.
Apang pahanumdom sini sa mga magabyahe nga panilagan ang tiyempo kag masamo magtsekyar sa mga abiso antes maglakat. Samtang, temporaryo nga ginadumilian ang island hopping kag tanan nga sea water related activities sa Southern Negros Occidental bangod sa mabalod nga kadagatan dala sang malain nga tiyempo.
Sa interview sang Bombo Radyo Bacolod kay Lieutenant Junior Grade James Carbajosa, commander sang Coast Guard Station Southern Negros Occidental, sila ang nagpagwa sang Sea Travel Advisory alas-5:00 kaina sang aga.
Ini bangod sa segi-segi nga mga pag-ulan umpisa kahapon sang hapon.
Dugang pa ni Carbajosa nga may mga tion nga hinali nagamadlos ang hangin.
Luwas sa island hopping, ginapanugyan man sa mga magagmay nga mangingisda nga likawan anay ang magpalawod.
Ini bangod may mga tion nga tuman ka balod sang kadagatan bangod sa pabag-o bag-o nga huyop sang hangin.
Ginapakamaayo naman sini nga humalin kahapon wala na maayo sang mga nagapadagat.
Nagpahanumdom man ini sa mga nagapuyo sa coastal areas nga mangin alerto kag panilagan ang mood sang dagat.
Suno diri, mas maayo nga magpreparar naman sang go bags inkaso kinahanglan magpatigayon sang evacuation.
