Nagbalik na ang byahe sang Ceres Bus nga may ruta Bacolod-Dumaguete vice versa sumugod kahapon.
Suno kay Jade Seballos, media relations office sa Vallacar Transit Inc, nakabatun na sila sang pagpahanugot gikan sa Negros Occidental Provincial Government.
Bangod sini, gilayon man nila nga gintsekyar kag ginseguro ang road worthiness sang mga Ceres Buses kasubong man gin-orient ang mga drivers kag konduktor.
Pasalig naman ni Seballos nga nabakunahan na sa COVID-19 vaccine ang tanan nga mga empleyado sa kompanya.
May guidelines man nga dapat masunod sang mga pasahero kalakip na ang requirement nga S-Pass kun sa diin nakabutang ang pangalan, edad kag cellphone number sang mga pasahero enkaso kinahanglanon sa contact tracing.
Dugang pa ni Seballos nga ipreparar naman sang mga magabyahe ang ila nga vaccination card, medical records ukon negatibo nga RT-PCR test result kun wala pa mabakunahan.
Paathag sini nga sa tagsa ka mga units, ginaseguro gid kun may dokumento ang mga pasahero kag indi mahimo makasakay ang wala sini.
Pahanumdom man ni Seballos nga dapat legal ang mga dokumento kag indi nga ginpahuman lang.
Pasalig sini nga nakahanda sa pagsunod sa anuman nga pagsulondan sang probinsya ang Vallacar Transit Inc, gani ang pumuluyo ang dapat handa man nga magtuman.
Paathag ni Seballos nga karun nga naggamay na ang kaso sang COVID-19, indi na sang mga ini luyag nga magbalik sa nakaligad nga sitwasyon gani istrikto sang mga ini nga ginapatuman ang health protocols sa mga byahero.
Sa karun, limitado palang nga mga units sang Ceres Bus ang ginapahanugutan sa pagbyahe kag may-ara lang nga ginapahanugutan nga numero ang probinsya.
