Magabalik na ang byahe sang Ceres Bus sang Vallacar Transit Incorporated sa palibot sang probinsya sang Negros Occidental sa Lunes kadungan sang general community quarantine.
Suno sa interview sang Bombo Radyo Bacolod kay Jade Seballos, Media Relations Officer sang Vallacar Transit Inc., may yara sang mga precautionary measures nga ipatuman.
Suno kay Ceballos, sa terminal lamang posible makasakay ang mga pumuluyo, bangod indi na magdulog ang Ceres Bus sa mga pasahero nga yara sa dalanon.
May-ara naman sang ibutang nga mga footbath kag wash area sa terminal, kasubong man ang pag-agi sa thermal scanning sa pagsaka sa bus kag ang pag-implementar sang ”no facemask no entry policy”.
Indi man pagpahanugutan nga makasakay ang mga may mataas nga temperatura ukon ginahilanat kag ginapakamaayo nga indi nalang magbyahe kun nagalain ang pamatyag.
May marker naman nga igabutang sa mga pulungkuan sa bus kun sa diin lang pwede makapungko agud mapatuman ang social distancing.
Samtang igasirado naman ang area sang driver agud masiguro ang proteksyon sini.
Ginpahayag man ni Ceballos nga indi na magatabok ang bus sa Oriental.
Ginapaathag man sini nga may mando ang LTFRB nga pagapasakaan ang plete sang mga pasahero.
Ginaklaro sini nga ang anunsyo ang nagikan sa LTFRB kag ini man ang magapagwa sang panibag-o nga rate nga igapatuman sa probinsya sang Negros Occidental.
