Ginbuhinan sang isa ka trip ang byahe sang mga fast craft vessels pagwa kag pasulod sa Bacolod City gikan ukon padulong sa Iloilo subong nga adlaw.
Sa interview sang Bombo Radyo Bacolod kay Frank Carbon, general manager sa Weesam Express, tatlo lamang ang ila nga byahe padulong sa Iloilo kag vice versa subong nga Enero 1.
Ang byahe gikan sa Bacolod City ang naga-umpisa alas-8:10 sang aga, sundan sang alas-11:00 kag isa sa hapon.
Samtang ang byahe naman gikan sa Iloilo padulong sa BREDCO Port ang naga-umpisa alas-9:50 sang aga kag duha ka byahe sa hapon.
Ginalauman na suno diri ang pagdagsa sang mga pasahero bangod bwas, Enero 2, balik naman ang regular nga opisina kag iban nga mga klase.
Bangod sini, panawagan ni Carbon nga magbakal sang ticket sang temprano agud deretso nalang sa pagsulod ilabi na nga sa toll gate pa lamang nagagutok naman ang mga salakyan sa pagsulod sa pier, nga madugangan pa kun magpila para sa pagbakal sang ticket, kag linya sa pagpasulod sang bagahe.
Panawagan pa sini nga magpadulong sa pier isa ka oras antes ang scheduled departure, agud nga indi mabiyaan kag kinahanglan nga maghulat sang masunod naman nga byahe.
Suno kay Carbon, dapat nga light weight lamang ang dal-on agud indi mag-antos sa pagbinakintol sang bagahi sa malaba nga linya.
Samtang bwas, Enero 2 balik naman ang regular nga byahe nga duha sa aga kag duha sa hapon, vice versa nga nagasugod alas-6:00 sa aga.
