Kasunod sang pagpagwa sang Executive Order No. 041-A series of 2021 ni Iloilo City Mayor Jerry Treñas nga nagapaidalum sa ciudad sa Modified Enhanced Community Quarantine (MECQ) sumugod kahapon tubtob alas-11:59 sang gab-i sa Mayo 31, 2021, nagpagwa naman sang Sea Travel Advisory ang Philippine Coast Guard Iloilo.
Nakabutang sa ginpagwa nga EO nga magapadayun ini kun indi pagbawion ukon ipauntat sang National Inter-Agency Task Force.
Kadungan sini magapatuman man sang moratorium sa pagbyahe sang mga indibidwal gikan sa Negros Island padulong sa Iloilo City kag pabalik humalin alas-12:01 sang kaagahon sa Mayo 25, 2021.
Ginapahanumduman naman sang PCG-Iloilo ang mga byahero kag mga maritime stakeholders nga ang tanan nga pasulod kag paggwa nga mga pasahero gikan sa Iloilo City padulong sa Negros Island kag vice versa ang temporaryo nga suspendido sumugod sa alas-12:01 sang kaagahon sa maabot nga Martes tubtob alas-11:59 sang gab-I sa Mayo 31, 2021.
Samtang ginapasalig naman sang PCG-Iloilo nga magapadayun ang pagbyahe sang mga cargoes pasulod kag paggwa sa Iloio City kag Negros Island.
