May nahisugtan na sa ginpatigayon nga meeting natuhoy sa pagbukas sang sea travel sang fast craft sa Bacolod-Iloilo nga ginpangunahan sang Maritime Industry Authority (MARINA).
Sa interview sang Bombo Radyo kay Commander Jansen Benjamin, pinuno sang Coast Guard Station – Negros Occidental, nahisugtan na nga magasugod ang byahe sang Weesam Express kag Ocean Jet sa maabot nga Oktubre 31 samtang magasugod naman ang SuperCat sa Nobyembre 1.
Nakahanda ang Coast Guard sa pagbukas sang sea travel kadungan sang pagpreparar sang mga personnel nga magabantay sa mga port kaupod ang K-9 units subong man magadeploy ang PDEA, PNP kag Special Operations Unit sang mga personnel.
Padayun gihapon nga igapatuman ang mga basic health protocols samtang 50 porsyento lang kapasidad sang pasahero nga mapahanugutan sa pagsakay agud nga ma obserbar ang social distancing.
Yara naman sa Executive Order ni Bacolod City Mayor Evelio Leonardia nga required sa mga pasahero nga padulong sa Bacolod ang magparehistro sa Bacolod Contact Tracing System (BaC-Trac).
Samtang ang mga pasahero nga magapadulong sa probinsya ang required nga magpaidalum sa mandatory swabbing sa mga swabbing booth nga napahamtang sa port.
Suno kay Benjamin, kun luyag sang taga-Bacolod ang magpaswab, sarang man ang mga ini nga makapaswab sa swabbing booth sang probinsya, apang indi ini required kag sarang na nga makagwa matapos ang scanning sang QR code kg pagsumite sang health declaration form.
Aminado naman ini nga sa umpisa manibag-o pa sila apang nagasalig man nga makaandan gilayon ang bag-o nga mga pagsulundan.
Ginalauman naman nga magpagwa sang schedule sang trip ang mga shipping company duha ka adlaw antes ang umpisa sang byahe agud nga mapost ini sa social media kag mapalayag sa media sa ihibalo sang mga pumuluyo.
Ginahulat pa sa karun kun ang RoRo sa Dumanggas Port ang magasunod sa Bacolod-Iloilo nga guidelines ukon magapatuman ini sang panibag-o.
Suno kay Benjamin, magadepende pa sa kadamuon sang pasahero kun magapasaka ang mga shipping company sang plete.
