Naguba ang isa ka tyangge matapos mabungguan sang salakyan samtang pilason naman ang isa ka bystander sa Lopez Jaena Street, Barangay Villamonte, Bacolod City kahapon sang udto.
Sa inisyal nga imbestigasyon sang Traffic Enforcement Unit sang Bacolod City Police Office, nadulaan sang kontrol sa ginamaneho nga Nissan Navarra si Renante Calvo, 52 anyos, single, residente sang Deca Homes Subdivision, Brgy. Cabug, Bacolod City gani aksidente sini nga nabungguan ang bystander nga si Tim Gamboa, residente sang Kappa Street, Greensville 1 subdivision, Brgy. Estefania, Bacolod City.
Matapos mabungguan ang bystander, nagderetso pa ang salakyan kag ginbungguan ang dirty kitchen sang Van Van Store nga ginapanag-iyahan ni Bayani Quilla, residente sang Lopez Jaena, Brgy. Villamonte, Bacolod City.
Ang bystander ang gilayon man nga ginadala sa Riverside Medical Center para sa nagakaigo nga pagbulong.
Nakaangkon naman sang damages ang dirty kitchen kasubong man ang water pipe sang Baciwa Primewater sang nasambitan nga tyangge, kasubong man ang unahan nga bahin sang salakyan.
Temporaryo naman nga gin-detain ang driver sang salakyan.
