Gin-athag sang miyembro sang Council of Concerned Citizens (C3) nga wala sila sang nakita nga ghost project sa anom ka mga natsekyar nga flood control projects sa Bacolod City, apang madamo sang nakita nga red flags.
Sa interview sang Bombo Radyo Bacolod kay former Councilor Atty Renecito Novero, wala sang ghost project apang sa assessment sang ila technical team, kalakip ang pila ka engineers, nga substandard ang pagkahimo sang mga proyekto.
Kalakip diri ang mga revetment projects nga wala nagagamit sang kabilya nga suno kay Novero, madasig lamang nga maguba.
Suno kay Novero mas maayo kuntani nga mabakod nga proyekto na lamang ang himuon.
Apang ginakahangawa sini nga ginahungod nga pigaw nga proyekto ang himuon agud madasig nga maguba kag mahatagan naman sang bag-o nga budget, butangan sang bag-o nga contractor, nga nagakahulugan nga bag-o naman nga kurapsyon.
Suno kay Novero, gina-usikan ang kwarta sang pumuluyo nga kuntani magamit pa sa mas importante nga proyekto kaangay sa health kag education.
Dugang pa ni Novero nga kwestyonable man ang project cost nga palarehas nga kapin P96.5 million apisar nga lainlain ang topography sang mga suba.
Ginalantaw nila nga mahimo may anomalya sa bidding process bangod wala pa P1 million ang deperensya sang project cost sa gintanyag nga bidding price.
Dugang pa ni Novero nga ginaphase by phase man ang proyekto, bangod Regional Office na sang Department of Public Works and Highways (DPWH) ang magahandle sang bidding process kun magdangat sa P150 million pasaka ang project cost.
Suno kay Novero, ini ang ginahimo agud mapabilin sa District Office ang pangamot sa bidding process.
Ginafinalize na lamang nila ang report tuhoy sa mga natukiban kag ini ang isumiter sa Senado, House of Representative, Independent Commission for Infrastructure kag sa Office of the Ombudsman.
Willing man sila nga magtestify kun ipatawag, santo sa ila mga natukiban.
