“Kun may kabudlay, sa ulihi may kalipay”, ini ang pahayag sang Cadet Corps Commander sang Reserve Officers’ Training Corps (ROTC) sang John B. Lacson Colleges Foundation – Bacolod matapos ini ginhingadlan bilang Outstanding Midshipman Officer of the Year.
Sa interview sang Bombo Radyo kay Midshipman Commander Junie Nunay JR, nag-umpisa ini sa pangabudlay kag napamatud-an sini ang hambalanon nga kun may yara sang pagpangabudlay, may yara man sang kamaayuhan.
Suno sa Bachelor of Science in Marine Engineering student, bisan siya nakibot sa nakuha niya nga award.// Suno diri, wala nangin mahapos ang iya naagyan bilang isa ka estudyante kag isa man ka Cadet Corps Commander sang ROTC.
Pahayag ni Nunay, luyag sini nga mangin isa ka Police apang nakakuha ini sang scholarship para sa BS Marine Engineering, natun-an naman sini nga palanggaon ang iya kurso.
Aminado man ini nga bangod sa iya nga mga naeksperyensya, nakakuha ini sang self confidence kag natun-an sini paano mangin isa ka lideres kag ehemplo para sa mga masunod nga henerasyon.
Pahanumdom ni Nunay nga indi pagpasugtan ang kaugalingon sa katawhayan, bangod nga kun may yara sang gintanum, may yara man sang anihon, kun may kasakit, may yara man sang benepisyo kag kun may kabudlayan may yara sang kalipay.
