Ginbisitahan sang alkalde sang ciudad sang Cadiz ang anum ka tripulante sang barge nga naglugdang sa bahin sang Masbate kag nasalbar sang mga manugpangisda nga residente sang Cadiz City, Negros Occidental.
Sa interview sang Bombo Radyo Bacolod kay Cadiz City Mayor Salvador “Bading” Escalante, kapin alas-4:00 kahapon sang hapon sang nakaabot ang anum ka tripulante sang LCT San Juan Bautista sa ciudad sang Cadiz sakay sa fishing carrier.
Suno kay Escalante, ginkamusta niya ang mga biktima kag ginbaklan sang pagkaon.
Ang anum ka tripulante ang gindala man sa isa ka hotel sa Cadiz agud nga didto makatulog.
Suno sa alkalde gincontact naman sang Coast Guard personnel ang tag-iya sang barge kag subong nga adlaw ang anum ang makapauli na sa Metro Manila.
Ang barge ang ginbakal lamang sa Cebu kag ginsakyan sang anum agud nga magbiyahe padulong sa Navotas apang sang ini ang naglab-ot sa ginapangisdaan sa bahin sang Masbate ini ang naglugdang.
Ginakabig naman sang anum nga ini na ang ikaduha nila nga kabuhi matapos nga maluwas sa naglugdang nga sakayan.
