Indi pa makadesisyon ang alkalde sang Cadiz City kun ano ang mangin plano sini sa tuig 2028.
Ini kasunod sang mga nagagwa nga mga impormasyon nga isa ini sa pagapilian agud mangin gobernador sang Negros Occidental sa nasambit nga tuig.
Wala man gindeny ukon ginkumpirmar ni Cadiz City Mayor Salvador “Bading” Escalante Jr. kun magapapili pa ini sa 2028.
Ini bangud ginakonsiderar pa sini ang iya nga edad nga magatungtong sa 64 kag ginalantaw man sini ang pagretiro na.
Suno kay Escalante sa karun indi pa ni makahambal kun ano ang position kun magapapili pa ini bangud kinahanglan man nga ikonsiderar ang desisyon sang ila nga partido.
Dugang pa sini nga wala pa ginaistoryahan sang local political party nga United Negros Alliance ukon UNEGA ang mga plano ilabi na sa masunod nga piniliay.
