Nagpalab-ot sang pagpakig-unong ang secretary general sang UNEGA kag alkalde sang Cadiz City sa pamilya sang iya abyan nga si late EB Magalona Mayor kag anay Negros Occidental 3rd District Board Member David Albert Lacson.
Madumduman nga nagtaliwan si Lacson sang Biyernes sa edad nga 46-anyos matapos nagpositibo sa COVID-19.
Sa interview sang Bombo Radyo kay Mayor Salvador Escalante, ginpahayag sini nga nakaupdanay sila ni Lacson bilang alkalde kag board member kag isa ka hipuson kag pribado nga tawo ang iya pagkakilala diri.
Suno kay Escalante, tuig 2018-2019 ang ila ulihi pag-updanay bilang board member kag naadmit ini sa Saint Lukes Hospital kun sa diin siya ang gin-abisuhan nga hagan-haganon lang ang pag-inom.
Humalin sadto, wala na ini sang update nagikan sa anay alkalde apang sang Miyerkules, adlaw nga naadmit man si Lacson sa ospital, sila ang nakatawganay pa.
Suno diri, nagtawag ini sa anay board member bilang secretary general sang UNEGA kag ginpahanumduman ini sang ila general assembly nga ginhiwat kahapon.
Suno sa iya, manami pa ang ila nangin pag-istoryahanay gani nakibot ini nga matapos ang duha ka adlaw, ini ang ginbawian sang kabuhi.
Nagpalab-ot ini sang pagpakig-unong sa pamilya bilang isa ka abyan kag in behalf sa ciudad sang Cadiz nga nangin malapit man sa tagipusuon ni Lacson.
