Ginkompirmar sang deputy chief sang Cadiz City Police Station nga madamo na sang insidente sang pagkalumos nga natabo sa Cabilang-bilangan Reef sa Barangay Sicaba, Cadiz City, Negros Occidental antes pa ang pagkalumos sang apat ka mga biktima kahapon.
Sa interview sang Bombo Radyo Bacolod kay Police Lt. Antonio Precia, ang mga nag-outing ang pamilya sang isa sa biktima nga si Marlyne Aguirre kag upod ang mga katrabaho kasubong man ang mga pamilya sang mga ini.
Santo sa ila imbestigasyon, ginpahayag sang mga survivor nga naglumpat nagikan sa tower ang 15 anyos nga biktima kun sa diin nalumos ini, naglumpat man ang iloy sini nga si Marlyne Aguirre agud luwason ang bata kag ginbuligan man ni Remymar Ocon kag sang 13 anyos apang bangud pahunas kag mabaskog ang current sang tubig nadala ang mga ini tubtob nalumos.
Ginpahayag man ni Precia nga masami man ginapadulungan sang mga pumuluyo sang Cadiz kag malapit nga lugar ang isla.
Suno diri sa tion nga magtaob nagakadula ang isla nga ginatindugan sang tower.
Suno pa diri, magluwas sa grupo sang mga nalumos, may yara pa sang nauna nga mga nagkadto sa lugar apang una man nga nakahalin bangud may yara sang bangka.
Wala man sang Bantay Dagat nga nagatinir sa isla magluwas nalang kun may yara sang operasyon sa pagpatuman sang mga ordinansa nga may kaangtanan sa municipal waters sang LGU.
Nagpanugyan man ini sa mga pumuluyo nga kun magkadto sa nasambit nga isla, dapat mag-upod sa mga nakaswito sa lugar bangud tuman kabaskog ang current sang tubig kag agud malikawan ang disgrasya.
Suno kay Precia, may yara man sang insidente sadto nga isa ka lalaki ang nagback dive halin sa tower sa pagdumdum nga may tubig apang sang naglanding nagtupa ang likod sini sa balas kun sa diin nakaagom ini sang samad kag nakasalbar man apang wala man nagdugay ginbawian man sang kabuhi.
