Priso ang isa ka suldado sa Negros Occidental matapos sini natirohan ang isa ka miyembro sang Citizens Armed Forces Geographical Unit (CAFGU) sa banwa sang Moises Padilla.
Natabo ang insidente sa sulod mismo sang detachment sang 12th Infantry Battalion Montilla Patrol Base Delta Company sa Purok Kasoy, Barangay Montilla, Moises Padilla.
Sa interview sang Bombo Radyo Bacolod kay Police Captain Harold Rendora, OIC station commander sang Moises Padilla Municipal Police Station, ginpahayag sini nga nag-inum ang biktima nga si Marty Villarma kag ang suspetsado nga si Staff Sergeant Adones Villanueva.
Naggwa naman sa imbestigasyon sang mga kapulisan nga samtang naga-inum ang duha, nagbaisay ang mga ini kag natabo ang komosyon kag didto na natirohan ni Villanueva si Villarma sa liog usar ang issued service firearms nga Gloc 17.
Apang suno naman sa suspetsado nga si Villanueva, indi sini hungod nga matirohan ang biktima kundi accidental firing lang ang natabo rason naman nga gilayon ini nagsungka sa mga kapulisan.
Ginahibalo naman sa karun sang mga kapulisan kun may daan nga hiligut-anon ang CAFGU member kag ang suldado nga posible amo ang motibo sa natabo nga pag-away nila.
Yara na sa kustodiya sang Moises Padilla Municipal Police Station si Villanueva kag naga-pangatubang sang kaso nga frustrated murder.
