Personal nga kaakig ang ginalantaw nga rasun sang Calatrava Municipal Police Station sa pagluthang patay sa isa ka mangunguma sa Sitio Dugma, Brgy. Malatas, Calatrava, Negros Occidental kahapon.
Sa interview sang Bombo Radyo Bacolod kay Police Major Wilfredo Benoman, hepe sang Calatrava Municipal Police Station nasapwan ang bangkay sang biktima nga si Nilo Salumag, may live-in partner, mangunguma, kag residente sa lugar.
Ini na ang ikatatlo ka asod-asod nga shooting incident humalin sang Marso 25 kun sa diin lunsay mga mangunguma ang biktima.
Kapin alas-9:00 kahapon sang aga, ginreport ni Punong Barangay Celsa Doremon sa Calatrava Municipal Police Station nga may-ara sang nasapwan nga bangkay nga may-igo sang bala.
Apang antes paman sini, alas-7:30 sang aga, nakita ang biktima nga nagalakat upod kay Alyas Jepoy, nga ginsundan sang pila ka lupok sang armas-luthang, apang ginpawalaan lamang sang mga residente.
Sang Marso 25, ginpatay ang 41 anyos nga mangunguma sa sulod mismo sang iya balay sa Sitio Calanugan, Brgy. Minapasuk; samtang sang Marso 26, patay naman ang 39 anyos nga si Alyas Boy matapos ginluthang sang nagpakilala buyer sang patay sini nga citrus fruit sa Sitio Cambalogbog II, Brgy. Telim, Calatrava.
Samtang sa karun si Alyas Jepoy nga ulihi nga nakita nga kaupod ni Salumag ang ginakabig naman nga person of interest.
Ini bangod matapos sang krimen, ini ang indi naman makita sa lugar.
