May person of interest na ang Calatrava Municipal Police Station sa pagluthang patay sa anay tanod kag drug personality sa Sitio Peson, Brgy. Minautok, Calatrava, Negros Occidental alas-7:45 sang Biyernes sang gab-i.
Ang biktima ang ginkilala nga si Alyas Mario, residente sang nasambit nga lugar samtang pilason naman ang hinablos sini nga si Alyas Rodel, 22 anyos.
Sa interview sang Bombo Radyo Bacolod kay Police Captain Jesus Alba, hepe sang Calatrava Municipal Police Station, pwersahan nga ginsulod sang 4 ka armado ang balay ni Mario kag gilayon ini nga ginluthang sang makapila ka beses sang isa sa mga suspect, samtang ang nabilin ang nagserbe naman nga lookout.
Nag-agom sang igo sang bala sa ulo kag pila ka bahin sang lawas si Mario nga nagresulta sa iya kamatayon samtang nasalabat naman si Rodel nga naigo sa tudlo sang iya natoo nga tiil.
Suno kay Alba, aktibo nga nagasuporta si Mario sa National Task Force to End Local Communist Armed Conflict (NTF-ELCAC) kag siya yara sa drug watch list sang kapulisan sa pagbaligya sang illegal nga druga.
Suno pa diri, subject para sa police operation si Mario apang masami ini nga nagasaylo-saylo sang lugar kag madugay na nga wala nakapauli sa ila balay.
Pahayag sini, madugay pa antes sila nakapadulong sa lugar kun diin nagluntad ang insidente bangod nabukid na ini nga area kag delikado amo nga nagpa-assist sila sa Negros Occidental Provincial Mobile Force Company.
