Nagapati ang Calatrava Municipal Police Station nga may foul play sa gina-alegar pagsuicide sang 28 anyos nga miyembro sang LGBTQ community sa Sitio Bilisa, Barangay Pinucutan, Calatrava, Negros Occidental.
Suno kay P/Maj. Roberto Indiape Jr, hepe sa Calatrava Municipal Police Station, ang biktima ang ginkilala kay Juvy Argoncillo, 28 anyos, residente sang Sitio Ma-apwa, Barangay Heneral Luna, sa nasambit nga banwa.
Pahayag ni Indiape nga sa pagsulod palang nila sa crime scene, nakita na nila gilayon ang posibilidad sang foul play sa kamatayon sang biktima.
Ang bangkay ang nasapwan nga nakabitay gamit ang higot sa ila nga papag sang iloy sang iya nga live-in partner.
Nahibaluan nga pakaduha man sang biktima ang iya nga ka-live in.
Suno kay Argoncillo, nahibaluan nga nag-away ang mag live-in partner antes paman ang insidente kun sa diin ginbuno sang biktima ang iya nga partner.
Bangud sini, nagpauli ang ka live-in ni Argoncillo sa iya iloy samtang siya naman ang nagpuli sa ila balay.
Pahayag sang iloy nga gin-ayo ini sang iya nga bata nga lantawon kun nakapauli na si Argoncillo kag didto na nasapwan sang iloy ang bangkay sang biktima.
