Opisyal nga ginbutang bilang bag-o nga station master ang calico cat nga si Yontama sang Kishi Station sa Kinokawa City, Japan, matapos ang pormal nga seremonya nga gintambungan sang mga opisyal sang Wakayama Electric Railway.
Nabakante ang amo nga posisyon bangud sa pagkamatay sang anay station master nga si Nitama sang nakaligad nga Nobyembre, nga nagserbisyo sa estasyon sa sulod sang halos isa ka dekada.
Sa pagpanguna ni Wakayama Electric Railway President Mitsunobu Kojima, ginbutangan sang medalya si Yontama bilang simbolo sang iya bag-o nga katungdanan kag responsibilidad sa estasyon.
Ang presensya sang “cat stationmasters” ang isa ka daku nga atraksyon para sa mga turista, nga nagabulig sa pagpasanyog sang rural railway line nga magasira na kuntani bangud sa manubo nga numero sang pasahero.
Sa amo man nga selebrasyon, ginpakilala man sang kompanya ang ila bag-o nga miyembro nga si Rokutama, isa ka kuting nga calico cat.
Ginpahayag sang management nga indi siya apprentice kundi ginakabig nga “stationmaster candidate.”
Ginalauman nga ipadayon nanday Yontama kag Rokutama ang legasiya sang ila ginbilin paagi sa pagengganyo sang mas madamo nga turista kag paghatag kabuhi sa komunidad.
