Yara na sa maayo nga kahimtangan ang call center agent nga nahulog nagikan sa roll-on roll-off vessel nagikan sa Dumangas padulong sa ciudad sang Bacolod kahapon sang hapon.
Sa interview sang Bombo Radyo kay Commander Joe Luviz Mercurio, commander sang Coast Guard Station Negros Occidental, si Michael John Balsomo sang Sitio Proper-A, Barangay Balicotoc, Ilog, Negros Occidental ang nagsakay sa Dumangas Port padulong sa Bacolod ala-1:00 sang hapon.
Apang samtang nagahamboy ini sa railings sang barko ginabanta alas-2:30 sang hapon, ini ang nakadanlog kag nahulog samtang nagalayag sa tunga-tunga sang Dumangas kag Bacolod.
Bangud wala sang kaupod si Balsomo, wala man sang nakatalupangod nga ini ang nahulog sa barko.
Maswerte naman nga ini ang nakit-an sang mangingisda nga si Ramon Travenia nga nagautaw-utaw, alas-3:00 sang hapon, gani iya nga ginrescue.
Gindala ni Travenia si Balsomo sa Barangay Punta Taytay agud nga makuhaan sang vital signs kag OK man ang iya kahimtangan.
Nagdesisyon si Balsomo nga sa barangay hall nalang sang Punta Taytay matulog, apang naghingyo man ang Bacolod Police Station 9 nga imbitaron ini para sa dugang nga pag-usisa.
Sa karon, maayo na ang kahimtangan ni Balsomo.
