Yara na sa karun sa kustodiya sang Bacolod Police Station 8 ang call center agent nga nakabunggo sa isa man ka call center agent nga nagatabok sa Araneta Street, Barangay Singcang-Airport, Bacolod City alas-9:50 kagab-i.
Ang biktima ang ginkilala nga si Erlynor Colango, 28 anyos, single kag residente sa Barangay Cabatangan, Talisay City samtang ang suspetsado amo si Rex Evrile Pedrajas, 37 anyos, single kag residente sa No. 3 Hugo Street, Purok Villa, Barangay Tangub, Bacolod City.
Sa interview sang Bombo Radyo kay Police Captain Glenn Montanio, station commander sang Bacolod Police Station 8, nagamaneho sang motorsiklo si Pedrajas nagikan sa sur padulong norte sang wala sila natalupangdan si Colango nga nagatabok sa pedestrian lane kag iya nabungguan.
Suno kay Montanio, madasig ang pagpadalagan sang suspetsado sang motorsiklo apang wala ini sa impluwensya sang makahulubog nga ilimnon.
Sa ulo ang igo sang biktima gani ini ang gindeklarar nag dead on arrival sa ospital.
Suno kay Montanio, papauli na kuntani ang biktima samtang padulong naman sa trabaho ang suspetsado.
Sa karun yara si Pedrajas sa kustodiya sang Bacolod Police Station 8 kag may initial settlement ini sa pamilya ni Colango.
