Patay ang isa ka call center agent matapos nga mabungguan sang motorsiklo nga ginadala man sang isa ka call center agent samtang nagatabok sa Araneta Street, Barangay Singcang-Airport, Bacolod City alas-9:50 kagab-i.
Ang biktima ang ginkilala nga si Erlynor Colango, 28 anyos, single kag residente sa Barangay Cabatangan, Talisay City samtang ang suspetsado amo si Rex Evrile Pedrajas, 37 anyos, single kag residente sa No. 3 Hugo Street, Purok Villa, Barangay Tangub, Bacolod City.
Paathag ni Pedrajas nga mahinay lamang ang pagpadalagan sini sang motorsiklo kun sa diin siya ang nagabyahe sa norte nga dereksyon padulong kuntani sa iya nga trabaho bilang call center agent.
Suno diri, yara ang iya nga presence of mind samtang nagamaneho kag wala man ini naka-inom, apang wala ini sang may nakita nga nagatabok.
Nabatyagan na lamang niya ang pagbunggo, kag gilayon man ini nakatukod kag nagpondo agud nga tsekyaron ang motorsiklo tubtob sa nakita sini nga ginasakay na sa ambulansya ang biktima.
Nahibaluan nga ang call center agent ang manugsulod naman kuntani sa trabaho samtang siya ang ginbuligan sa pagtabok sang isa ka security guard.
Dugang pa ni Pedrajas, nga nakibot nalang ini sang siya ang ginhambalan sang security guard nga nabungguan sini ang biktima kag nadulaan gid sang kabuhi.
Kapin tatlo tubtob lima ka minutos nag-abot man gilayon ang mga kapulisan gani ginpakamaayo nalang sini nga mag-upod sa patrol sang Bacolod Police Station 8.
