Nangin matawhay ang ginpatigayon nga una nga adlaw sang pagkampanya sang local candidates nga nagapadalagan sa ciudad sang Bacolod para sa 2025 Midterm Elections.
Ginpatigayon ang campaign kick-off sang Team Asenso sa Paglaum Sports Complex samtang ang sa Team El Cid naman ang ginpatigayon ang Opening Salvo sang kampanya sa Bacolod City Public Plaza.
Lunsay gintambungan sang mga supporters ang tagsa ka mga campaign rallies.
Sa tagsa ka mga programa sa kick-off sang kampanya ginplastar sang mga ini ang ila mga plata porma kun mahatagan sang kahigayunan nga makapungko bilang opisyales sa ciudad sang Bacolod.
May mga banda man nga nagtukar sa tagsa ka ginpatigayon nga kick off campaigns agud nga maglingaw sa mga supporters.
May mga kapulisan man nga gindeploy sa tagsa ka mga venues agud nga magsiguro sang seguridad sang tanan.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 1, wala sang narecord nga insidente nga may kaangtanan sa ginpatigayon nga campaign rally.
Suno kay Depasucat, may yara sang mga gindeploy nga mga kapulisan agud nga magsiguro sang seguridad sang mga supporters kag kandidato lugar.
Ang mga ginpangdeploy nga kapulisan ang nagikan man sa nagkalain-lain nga police units sang Bacolod City Police Office (BCPO).
