Nagsugod na humalin kaina alas-12:01 sang kaagahon ang campaign period sang Barangay and Sangguniang Kabataan Election.// Sa interview sang Bombo Radyo Bacolod kay Bacolod City Election Officer Atty. Katrina Trinio-Cana, subong nga adlaw ang makabig opening salvo para sa pagpangampanya sang mga kandidato.
Pasalig sini nga padayun ang pagmonitor sang Commission on Election (COMELEC) Bacolod kun nagakasunod ang pagsulundan sa eleksyon.
Paathag ni Caña nga ang mga pagfile sang disqualification sa madamo na nga mga kandidato ang nagapakita lamang sang pagkaseryoso sang Comelec sa paglagas sa mga nagabayolar sa election law kaangay sang premature campaigning.
Pahanumdom sini nga antes paman ang filing sang certificate of candicacy, makapila na nga ginsulit-sulit ni Comelec Chairman George Garcia nga I-obserbar ang campaign rules.
Ang Comelec Bacolod ang nakapadala naman sang 12 ka show cause order batok sa mga kandidato, kun sa diin kalabanan diri ang nagapadalagan bilang SK chairman.
Paathag ni Caña nga wala sang ginpadal-an show cause order nga nagapapili bilang Kagawad, kundi lunsay nagapapili bilang Punong Barangay ukon SK Chairman.
Ini bangod sa nasambitan nga mga pwesto lamang masami mainit ang mga issue.
Paathag naman sang Election officer nga ang pagpadala sang show cause order ang wala nagakahulugan nga may kaso na ang mga natungdan.
Suno kay Caña, ginapapasabat lamang ang mga ini kun ngaa sila ang may mga aktibidad nga ginpangbuhat apisar wala pa ang campaign period.
Dugang pa sini nga bisan ang mga napasakaan sang disqualification case ang ginahatagan man sang tyansa nga makahatag sang pagpaathag.
Subong nga umpisa na ang campaign period, panawagan ni Caña nga I-obserbar ang sunod sa layi nga mga campaign propaganda’s, pagsunod sa 2×3 feet nga poster size, kag kun mahimo sa common poster areas na lamang magtapik sang mga campaign materials.
Apang paathag sini nga sarang man makapatapik sa mga pribado nga propedad kun may pahanugot sang tag-iya, apang ini ang dapat nakasunod gihapon sa recommended size.
Kinahanglan man nga magpangayo sang permits sa City Government sa pagpatigayon sang rally, kag panugyan ni Caña nga ipahibalo sa Comelec office kun may kaangay nga mga aktibidad.
Samtang indi man dapat kalimtan nga ang campaign expenses ang P5 per registered voters gid lamang, kag ini makita sa filing sang statement of election contributions and expenditures.
