Ginakonsiderar nga isaylo ang venue sang campaign rally sang mga kandidato nga ginasuportahan ni President Ferdinand “Bongbong” Marcos Jr. sa Victorias City sa Biyernes imbes nga sa Bacolod City.
Sa interview sang Bombo Radyo Bacolod kay Councilor Al Victor Espino, sa inisyal nga plano ang Presidential visit ang patigayunon kuntani sa Paglaum Sports Complex sa ciudad sang Bacolod.
Ini bangod mas malapad ang area kag sarang kuntani nga makacater sang 30,000 nga supporters.
Apang bangod may-ara sang weather forecast nga 70 porsyento ang tyansa nga maga-ulan sa Biyernes, ang venue ang ginpili na lamang nga sayluhon sa Victorias City Coliseum.
Ini bangod wala sang atop sa Paglaum Sports Complex gani mahimo nga mabasa sang ulan ang mga magatambong, samtang mabudlay man kun maglutak ang field.
Sa pihak nga bahin 10,000 naman ang maakomodar sang Victorias City Coliseum.
Suno kay Espino, inkaso nga magsobra ang mga supporters, ang mga ini ang mahimo man nga macater sang mga tents sa gwa sang venue.
