BACOLOD CITY-Nag-negatibo sa 2019 novel coronavirus acute respiratory diease (NCOV-ARD) ang Canadian national nga ginkabig isa sa mga person’s under investigation (PUIs) sa Negros Occidental.
Ini ang ginkumpirmar ni Dr. Mary Jane Juanico, head sang Infectious Diseases Section sang Department of Health (DOH) Region 6 subong nga aga matapos naguwa ang resulta sang specimens nga ginkuha sa Canadian kag ginpaguwa sang Research Institute for Tropical Medicine (RITM).
Santo sa rekord sang DOH Region 6, duha ang nangin PUIs sa Negros Occidental lakip na diri ang Canadian national nga nag-negatibo na sa coronavirus.
Magluwas sa Canadian national, isa pa ka 58-anyos nga Pinay ang PUI nga yara karun sa Corazon Locsin Montelibano Memorial Regional Hospital.
Sa karun ginahulat sang Infectious Diseases Section DOH Region 6 ang resulta sang test para naman sa Pinay.
Ang rekord sang DOH Region 6 ang wala nagasanto sa datos sang Bacolod City kun sa diin may yara sang tatlo ka PUIs nga yara sa regional hospital sa karun nga ginalakipan sang Canadian national, 12-anyos nga lalaki nga Negrense nga may travel history sa Hong Kong kag Macau kag ang isa ka 58-anyos nga Pinay nga nakapadulong naman sa Hong Kong sang damlag lang.
