BACOLOD CITY — Nagakasubo ang mga empleyado sa Kapitolyo sang Negros Occidental bangud sa pagtaliwan sang pinuno sang Special Concerns and Projects Division sang probinsya.
Alas 8:00 Martes sang aga sang nagtaliwan si Ian de Ramos bangud sa cirrhosis of the liver.
Sa impormasyon nga nakuha sang Bombo Radyo, si de Ramos ang nadiagnose sa amo nga balatian sang Setyembre tuig 2107 kag ginpahayag sang doktor nga may yara ini sang anom ka bulan nga taning sa kabuhi.
Antes nagtaliwan, nagtambong pa si de Ramos sa Negros Occidental Economic Development Planning workshop nga ginpatigayon sa Mabalacat, Pampanga.
Pagbalik sini alas 7:00 Martes sang aga, nagdiretso ini sa ila opisina apang nagreklamo nga nakapoy.
Gindala ini sa Bacolod Adventist Medical Center apang ginbawian sang kabuhi kaina sang aga.
Nakibot naman ang isa sa mga kaupod sini sa Pampanga nga si Metro Bacolod Chamber of Commerce and Industry chief executive officer Frank Carbon.
Suno diri, mapagsik man si de Ramos sa workshop kag nagapakigbahin pa sang discussion.
Si de Ramos ang nagasugod sa provincial government sang tuig 1982.
Gilayon naman nga nagpalab-ot sang simpatiya si Governor Alfredo Marañon Jr. sa pamilya de Ramos kasunod sang pagtaliwan sini.
Aminado ang gobernador nga dako nga kadulaan sa kapitolyo ang pagtaliwan ni de Ramos.
