Nagakalipay ang Progressive Alliance of Capitol Employees sa dako nga bonus nga batunon sang mga empleyado sang Kapitolyo.
Sa interview sang Bombo Radyo sa kay PACE Vice President Renelo Lastierre, nagpasalamat ini kay Governor Eugenio Jose Lacson kag sa mga opisyales sang probinsya sa paghatag sang P60,000 nga bonus sa mga empleyado sang Kapitolyo.
Aminado si Lastierre nga mas nubo ang ila nabaton nga bonus kun ikomparar sa tinalikdan nga tuig kun sa diin P80,000 ang ginhatag sa ila apang nagakalipay ini gihapon bangud suno sa iya, maswerte ang probinsya bangud wala sang mga kalamidad nga nag-igo diri subong nga tuig.
Nagalaom man ini nga mangin madasig ang pagproseso sang service recognition incentive bonus nga P10,000 para sa mga empleyado sang gobyerno.
Suno sa iya, ang casual kag permanent nga mga employee ang pareho nga makabaton sini.
Gindugang niya man nga ang paghatag sang mga bonus kag incentives ang isa ka pagpanghangkat sa mga empleyado nga padayunon ang ila maayo nga pagserbisyo.
Nagpasalig man ang PACE vice president nga apisar madamo sang bakante nga posisyon, nagafunction sa gihapon sang maayo ang kapitolyo.
