Nag-assume na bilang panibag-o nga deputy commander sa Coast Guard District Western Visayas si Capt. Ludovico Librilla, nga amo man ang commander sa Coast Guard Station Negros Occidental.
Suno kay Librilla, nagpungko ini sa panibag-o nga mando nagikan sa National Headquarters sang Philippine Coast Guard.
Santo sa plano kag programa, ginhatagan ini sang derektiba sang district commander nga siya ang magasupervise sa mga floating assets sa bilog nga Western Visayas.
Suno diri, ang derektiba sa iya amo ang masiguro nga masami nakahanda nga magpadagat ang mga sakayan.
Kasubong man nga maseguro nga naga-operate ang tanan nga floating assets, kag nakahanda nga madeploy sa tion sang emerhensya sa bisan diin nga bahin sang Western Visayas.
Nagapasalamat naman si Librilla sa pagsalig kag confidence nga ginhatag sa iya sang Distric Commander nga siya ang ginpili agud nga mangin deputy commander sini.
Suno diri, panibag-o ini nga challenge para sa iya nga career, kag pahanumdom lang sini sa mga personnel nga iya nga masakupan ang “work work work’, ukon padayun lang sa pagtrabaho.
Samtang, ginapaathag naman sini, ilabi na sa mga pumuluyo sa Negros Occidental, nga nagapabilin gihapon nga siya ang Station Commander sa probinsya.
Panugyan man ni Librilla nga kun may concerns may kaangtanan sa Coast Guard, indi magduhaduha nga magpalapit sa tagsa ka mga substations sa mga banwa kag syudad.
Pasalig sini nga kun kinahanglan ang ila nga serbisyo, nakahanda ang mga personnel sang Philippine Coast Guard nga magbulig sa nagakinahanglan.
