Magasunod lamang sa mando sang city government ang caretaker sang Burgos Public Cemetery angot sa ginapahayag “closure” sang patyo.
Nahibaluan nga pila ka mga residente nga nagapuyo sa sulod sang Burgos Public Cemetery ang nagakahangawa sa ila nga palangitan-an pananglitan nga magsirado ang sementeryo.
Ini ang kasunod sa notice nagikan sa General Services Office sang ciudad nga ginapangunahan ni Jerome Solinap kun sa diin nakasaad nga sugod Disyembre 1, 2020 indi na pwede makalubong amo nga patyo bangud nga gutok na ini katama apang pwede sa gihapon ang visitation nagikan sa mga himata.
Sa interview sang Bombo Radyo Bacolod kay Ricardo Repogio, caretaker sang amo nga sementeryo, ginpahayag sini nga bilang isa ka caretaker, responsibilidad niya nga proteksyunan kag bantayan ang mga pantyon kag magasunod lamang ini sa mando sang gobyerno.
Suno kay Repogio, dapat nga magsunod nalang ang tanan sa mando bangud para man ini sa kaayuhan sang kadamuan.
Samtang, pabor naman si Fidel Casiple, 44-anyos kag isa sa mga naga-istar sa sulod mismo sang patyo nga pasayluhon sila sa relocation site apang nagakahangawa naman ini nga madulaan sang palangitan-an.
Suno kay Casiple, humalin sang ginbun-ag ini, sa sementeryo na ang ila nga palangitan-an kaangay na lamang sa pag-obra sang pantyon ukon paghimo sang lapida kag iban pa.
Dugang pa sini nga kapin duha na ka tuig sang nag-apply sila sa Bacolod Housing Authority apang tubtob subong daw kaangay lang nga wala ginahatagan sang pagtamod ang ila nga aplikasyon.
