Karun nga nagahilapit na ang tigkalalag, ginpakigbahin man sang caretaker sa isa ka museleo sa syudad sang Bacolod ang eksperyensya sini sa sulod sang 25 ka tuig.
Suno kay Henry Poblador, caretaker sa De la Rama Museleo sa Barangay 28, ang private cemetery ang gintukod sadto pang 1889 samtang katapo lamang sang ila pamilya ang sarang nga malubong diri.
Pahayag ni Poblador nga sadto, siya ang nagapuyo sa atubang mismo sang sementeryo apang bangod sa road widening project nakabahin sa gindemolish ang iya balay kag karun natransfer na sa Purok Arao.
Aminado man ini nga normal lamang nga may mabatian sa sulod sang sementeryo kaangay sang nagahibi, nagapanitsit kag naga-ugayong nga iya naman na-eksperyensyahan.
Nagapati si Poblador nga ang patay ang nagapalab-ot sa iya sang mensahe agud nga ini ang bisitahan man sang iya mga himata.
Dugang pa sini nga iya ginpinsar nga ang buang nga babayi nga masami nagasulod sa sementeryo ang nagahibi.
Apang sang ginpasiga sini ang suga kag ginlibot ang sementeryo, didto sini napamatud-an nga wala sang tawo sa museleo.
Gilayon man nga ginpalab-ot sang caretaker sa ila opisina ang hitabo gani ginpamisahan ang minatay.
Pahayag sini nga siya ang wala na nahadlok sa mga kaangay nga pagpabatyag bangod nakahibalo ini nga nagahatag lamang sang mensahe ang espiritu.
Dugang pa ni Poblador nga kada alas-6:00 sang gab-i siya ang nagasindi man sang kandila kag nagapangamuyo para sa kalag sang mga minatay nga ginalantaw man nga rasun kun ngaa siya ang nagdugay sa kaangay nga trabaho.
Wala man ini nahadlok bangod wala man siya sang ginabuhat nga pagtinunto sa mga patyo.
Apang aminado ini nga may mga nagasulod sa museleo agud magpangawat sang marmol nga lapida.
Suno diri, may pila na ini nga nagkaladakpan nga gilayon man niya nga ginreport sa Bacolod Police Station 6.
