Patay ang isa ka caretaker matapos gintiro sang wala pa matumod nga suspek sa sulod sang Team Juan Game Farm, Zone 5, Barangay Concepcion, Talisay City, Negros Occidental kaina sang aga.
Sa interview sang Bombo Radyo Bacolod kay Police Major Wilfredo Benoman, nakabaton sila sang impormasyon nga may yara sang nagluntad nga shooting kag gilayon man nila ginrespondehan.
Ginkilala ang biktima kay Felix Baylocon, 29 anyos, residente sang Hda. Mambucano, Barangay Cabatangan, Talisay City, Negros Occidental kag temporaryo nagapuyo sa game farm.
Suno kay Benoman, sa inisyal nga imbestigasyon sang Talisay City Police Station, nagapangape ang biktima kaupod ang iya ka live-in sa atubang sang nippa hut sa sulod sang farm, sang hinali nga ginpalapitan sang lalaki nga nagasuksok sang itum nga tshirt kag short pants kag gintiro sang makapila ka beses ang biktima nga nagresulta sa kamatayon sini.
Ang biktima ang nakaangkon sang pilas sa liog kag nawala nga abaga.
Gilayon naman nga nagpalagyo sa wala mahibaluan nga direksyon ang suspek.
Nagapadayon sa karun ang imbestigasyon sang Talisay City Police Station agud matumod ang motibo kag ang suspek sa krimen./
