Aprubado na sang Bacolod City Council ang request sang Bacolod Yuhum Foundation nga pagtukod sang carnival rides sa Lacson Tourism Strip.
Ang request ang ginpresentar sa session sang Sangguniang Panlungsod kahapon.
Sa interview sang Bombo Radyo Bacolod kay Councilor Em Ang, chairperson sang Committee on Markets, gin-athag sini nga indi gid makabig nga peryahan ang ginpahanugutan.
Ini bangod mga carnival rides lamang ang ginpahanugutan kaangay sang kiddie rides, mga bikes, shooting gallery kag vikings, samtang hugot naman nga gindumili ang mga may panahor.
Paathag sini nga sa shooting gallery, pagkaon ukon candy lamang ang ila igahatag nga premyo.
Suno kay Flor, luyag nila nga maka-enjoy sang dugang nga carnival rides ang mga kabataan.
Ini ang ihamtang sa South Capitol Road, sa bahin nga indi makadisturbo sa mga kasapatan sa zoo.
Santo sa resolusyon, ang pagtukod sang carnival rides ang sarang na masuguran subong nga adlaw, kag ini ang maga-operar halin Oktubre 25 tubtob 27.
Apang magakinahanglan pa nga magrequest sang approval ang Bacolod Yuhum Foundation sa Negros Occidental Provincial Capitol bangod ang dalan ang kabahin pa sang ila area.
Ang carnival owner, amo man ang tag-iya sang nahamtang sa Bacolod City Government Center, Reclamation Area kag ang ginpauntat nga peryahan sa Bacolod Public Plaza.
Pasalig ni Flor nga hinali nga may paglapas, ukon may matukiban nga may ginpatigayon nga gambling activities sa Lacson Tourism Strip, gilayon nga isarado ang carnival rides.
Sa session, nag-abstain si Councilor Kalaw Puentevella samtang nagpamatok naman si Councilor Jason Villarosa, ang chairperson sang Committee on Tourism.
