Ginalantaw ni Bacolod City Vice Mayor El Cid Familiaran nga indi pa maka-operate sa Oktubre 1 ang carnival sa likod sang Bacolod City Government Center.
Kahapon, gin-aprubahan sang Sangguniang Panlungsod ang hingyo sang organizer sang MassKara Festival nga Bacolod Yuhum Foundation nga mabutang sang carnival sa football field sang BCGC, apang ulihi na ini bangud pila na ka semana ang nakaligad humalin sang nag-abot ang operator nga maga-install kun sa diin ginpauntat sang city government ang installation pending sang approval sang Konseho.
Suno kay Familiaran, madugay ang installation sang carnival kag tsekyaron pa sang Bureau of Fire Protection antes ang pag-operate.
Suno kay Familiaran, newbies ang nagapamuno sa Bacolod Yuhum Foundation gani may mga butang nga wala nila nahibaluan nga kinahanglan gali sang approval sang Konseho antes ang pagsugod.
Kun mamierdihan ang operator suno sa bise alkalde, mahimo nga istoryahan nalang nila ini sang organizer.
Wala pa man sang nakaplastar nga mga kiosko kag banderitas bisan manugtapos na ang bulan sang Setyembre apang ginalauman nga mahimo may mga installation na bwas nga adlaw, Setyembre 30, samtang balantayan naman ang mga aktibidad kag traffic sa Upper East.
Aminado naman ang bise alkalde nga nagakadapat gid butangan sang banderitas ang Dalan Lacson bangud diri ang sentro sang ciudad kag mas festive ang mabatyagan sang mga pumuluyo kun madamo sang banderitas.
Bangud bag-uhanon ang mga nagabug-os sang Yuhum Foundation suno sa iya, bisan ang mga sulat sa mga sponsors ang ulihi naman napagwa.
