Ginpahayag sang Valencia Municipal Police Station nga case closed na ang pagluthang-patay sa pakaisa ni Negros Oriental 3rd District Rep. Arnie Teves sang Pebrero 5 subong nga tuig.
Kahapon, nagreklamo si Teves nga kadasig lang nadakpan ang mga suspetsado nga nagpatay kay Governor Roel Degamo samtang wala naman sang suspetsado nga natumod sa kamatayon sang iya nga pakaisa nga si Don Paulo Teves, utod ni Valencia Mayor Edgar Teves Jr.
Ang lawas ni Don Paulo Teves ang ginputos sa puti nga habol kag plastic kag nasapwan ini sang mga residente sa basurahan sa Purok Tres, Barangay Calayugan, Valencia.
Sa interview sang Bombo Radyo kay Police Capt. Raphael Lorenz Serion, hepe sang Valencia Municipal Police Station, ang Danish national nga si Tim Moerch ang ginkasuhan angot sa kamatayon ni Don Paulo bangud nagpositibo ini sa paraffin test.
Ang mga kaupod sini nga akusado amo ang iya live-in partner nga si Myla Cagas kag ang abyan nga si John Edward Remullo sang Dumaguete City nga ginapahayag amo ang naghaboy sang bangkay.
Si Remullo ang nakapaidalom na sa preliminary inquest sa kaso nga accessory to murder.
Sanday Moerch kag Cagas naman ang ginhilway sa prisuhan sang Pebrero 8 apang sila ang ginpatay sang riding-in-tandem suspects sang papauli ang mga ini nagikan sa prisuhan.
Suno sa hepe, case closed na ang kay Teves samtang ginatumod pa ang motibo sa pagpatay sa Danish national kag sa iya nga live-in partner kag ginatumod pa man kun sanday sin-o ang mga suspetsado.
