Padayon ang pagpanagtag sang probinsya sang Negros Occidental sang cash assistance para sa mga hog raisers nga napatyan sang baboy bangod sa African Swine Fever.
Suno sa pinuno sang Negros Occidental Provincial Social Welfare and Development Office, Chiqui Gonzales, wala ginlauman nga magresulta sang dako nga halit ang ASF sa probinsya amo nga P10 million lamang ang budget nga naalokar para diri.
Suno diri, magabaton sang tag P2,000 ang kada hog raisers bisan pa nga masobra sa isa ang baboy nila nga napatay.
Nakaligad lamang nga bulan sang Disyembre sang nahatag na sang probinsya ang assistance sa anum ka barangay sa banwa sang Ilog kag sa palaabuton nga Pebrero 13, tatlo naman ka Local Government Units ang pagahatagan nga ginalakipan sang banwa sang Valladolid, banwa sang Hinigaran kag banwa sang San Enrique.
Samtang, may yara pa sang ginapaabot nga dugang nga mahatagan sang assistance sa banwa sang Ilog. Sa P10 million nga budget, 5,000 ka mga indibidwal ang makabaton sang tag P2,000 kada isa.
